ملخص مؤتمر جوجل 2017 , Google Clips,Pixel 2 XL,Google home max, DAYDREAM VIEW,Google Pixelbook, Pixel Buds
100 100 100

ملخص مؤتمر جوجل 2017 , Google Clips,Pixel 2 XL,Google home max, DAYDREAM VIEW,Google Pixelbook, Pixel Buds


من شويه يادوب لسه خلصان مؤتمر جوجل، هى اعلنت فيه عن اكتر من حاجه جديده .. فيه منها اللى اصدارات جديده لأجهزه اعلنت عنها قبل كدا .. و فيه منها منتجات جديده تماما اول مره نشوفها من جوجل .. فإسمحلى اقولك على الزتونه بتاعتهم كدا على السريع  

Google Clips


:D
1- كاميرا Google Clips .. ودى كاميرا تقدر تعلقها او تشبكها بسهوله فى اى حاجه عشان تصور بيها اللى انت عاوزه او تعرف مين اللى بيشرب البيبس بتاعك من التلاجه .. عموما الكاميرا بزاوية عريضه زى ال GoPro كدا، وممكن تصور لحد 15 صوره فى الثانيه و المفروض انها بتتعلم من الصور ايه اللحظات المناسبه عشان تصور فيها "لحظة فتح باب التلاجه طبعا" .. وسعر الكاميرا هيكون 250 دولار بس .. يعنى بتمن اكتر من 800 كانز بيبسي .. ف اعتقد هتغير رايك فى الموضوع دا دلوقتى ..
--------


2- موبايلات بيكسل الجديده Pixel 2 و Pixel 2 XL
انا هقول المواصفات بس لان هيكون ليهم بوست لوحدهم عشان اقول اللى فى نفسي ..
الجهازين بيجوا بسنابدراجون 835 مع 4 جيجا رام و ذاكره 64 او 128 جيجا، كاميرا ورا بدقة 12.3 ميجا بيكسل بفتحة عدسه 1.8 وكاميرا قدام 8 ميجا بيكسل بفتحة عدسه 2.4
البكسل 2 العادى شاشته 5 بوصة بدقة 1080p و مش Frameless زى باقى الموبايلات اللى فى فئتة عموما .. و بطاريته 2700 ميللى امبير ..
اما ال XL فشاشته 6 بوصة وبدقة 1440p و بفريم صغير ومقارب جدا للى موجود فى ال LG G6 .. بس كدا .. انت مستنى ايه؟؟! ..
مفيش حاجه جديده تانى تذكر فى الاجهزه تقريبا :(
--------

3- ال Google home max و دا زى الجوجل هوم بتاع السنه اللى فاتت بس على كبير بقى .. بصوت اعلى بكتير من الجوجل هوم العاديه .. المفروض ان الاصدار دا كمان بيميز المكان اللى سيادتك موجود فيه و بيعدل فى الصوت اللى خارج منه بحيث انه يناسب حجم و طبيعه المكان اللى انت فيه عشان الصوت لما يوصل لودانك سعادتك يكون حلو كدا ونقى بدل "السماعات سبيكر" اللى لسه معاك من ايام كمبيوتر الصقر .. اه و على فكره .. البتاعه دى سعرها هيكون 400 دولار بس !
--------
4- اصدار جديد من ال DAYDREAM VIEW مع الوان جديده عن اللى كانت موجوده السنه اللى فاتت وسعرها هيكون 99 دولار
--------
5- سماعات Pixel Buds .. انا مش هتعب نفسي عشان اشرحها .. هى زى ال Apple AirPods و من قبلها ال Gear IconX بتاعة سامسونج .... من الاخر هى سماعه بلوتوث عاديه بس مش كل سماعه منفصله لوحدها .. لا بينهم سيلك بيوصلهم .. بس المميز فيها ميزة الترجمة الحيه لأكتر من 40 لغة .. السماعه كمان بيجى معاها علبه بتحطها فيها .. والعلبه دى فيها بطاريه بتقدر تشحنلك السماعه لحد 5 مرات وسعرها هيكون 160 دولار
--------
6- الـ Google Pixelbook .. بص انت لو عارف فكرة ال Chromebook الموضوع هيبقى سهل عليك .. لكن لو مش عارف ركز معايا .. دا جهاز شكله كدا زى اللابتوب .. بس معليهوش ويندوز .. عليه حاجه اسمها Chrome OS .. ولو مش عارف دا كمان ممكن تشوف الفيديو دا https://goo.gl/VqYg10 عشان تفهم الكونسبت نفسه ..
المهم يعنى الجهاز دا بيجى بشاشه 2k تقريبا و ببروسيسور i5 او i7 الجيل السابع ورام من 8 لحد 16 جيجا وميمورى من 128 ل 512 جيجا وشاشته بتلف بحيث انه ممكن يبقى تابلت و سعره هيبدأ من 999 دولار .. جوجل اعلنت كمان عن قلم ليه اسمه Pixelbook Pen وسعره هيكون 100 دولار بس!
--------
7- الـ Google Home Mini و اللى ما هو الا اصدار صغير من ال Google Home اللى اعلنوا عنه قبل كدا .. الجهاز ممكن يتصل مع الكروم كاست ومن خلاله تقدر توصل لجميع خدمات جوجل وسعره 50 دولار "من الاخر تجيب واحده منه للعيال عندك يلعبوا بيها بدل ما يقعدوا يكبولك ميه على اللابتوب بتاعك اللى لسه بتسدد فى اقساطه ..
--------
دا ملخص سريع للى حصل فى مؤتمر جوجل ..
بأكد تانى ان تليفونات بيكسل هيكون ليها بوست منفصل عشان بس اشمر الكم واخد راحتى فى الضرب .. اقصد الكتابه يعنى :D
السابق
هذا أحدث موضوع
التعليقات
0 التعليقات
شكرا على تعليقك ❤